Hefur nokkuð verið gert í uppbygginu stofnbrautakerfis fyrir hjólafólk?

Framkvæmdir eru byrjaðar á stígunum meðfram Miklubrautinni sunnanmegin og að venju eru þær illa merktar og ekki bent á hjáleiðir þar sem stígar eru lokaðir eða hafa reyndar verið fjarlægðir. Frekar en að fjalla um það í löngu máli bendi ég á fyrri dæmi á sama stíg sem hefur verið lokað heilu og hálfu árin undan farin ár.  Þarf nú að fara yfir tvær innanhverfisgöngubrýr til að komast í stórum krók framhjá mislægu gatnamótunum við Réttarholtsveg.  

Heldur hefði ég viljað fá göng undir gatnamótin svo stígurinn sunnan Miklubrautar væri ekki lokaður og að peningurinn sem fór í brýrnar hefði farið í að byggja upp stofnbrautakerfi um borgina sem voru veitt fyrirheit um í Aðalskipulagi frá 1996. Þar stóð "Unnið er að því að bæta göngu- og hjólreiðaleiðir til þess að hjólreiðar og ganga geti orðið öruggur og raunhæfur ferðamáti á styttri leiðum."

Hjólreiðamenn þurfa að fara að vera enn gagnrýnni á hvað er verið að gera í stofnbrautakerfi fyrir hjólreiðafólk. Mér finnst lítið hafa verið gert fyrir utan flágavæðingu gatnamóta. Göngubrýrnar tvær yfir Miklubrautina og brúin yfir Kringlumýrarbraut hjá Borgartúni eru bara innanhverfisbrýr fyrir fólk sem gengur í skólann eða Hagkaup en eru ekki partur af stofnbrautakerfi. 

   Ársgamall stígur við Ánanaust
   Þarna er ekki byggt til framtíðar og augljóst að þar   sem stígur fer svona á einu ári er ekki um að ræða "göngu- og hjólreiðaleiðir" sem verða " til þess að hjólreiðar og ganga geti orðið öruggur og raunhæfur ferðamáti á styttri leiðum." 

Fyrsta brúin yfir Kringlumýrarbraut og sú sem er undir Gullinbrú eru partur af stofnbrautakerfi. Flestir nýjir stígar meðfram ströndinni eru útsýnis og útivistarstígar, ágætir í góðu verðri en ekki partur af stofnbrautakerfi þegar fer að hvessa og sjórinn gengur yfir þá.  Í raun hefur kannski ekkert verið gert í því að útbúa stofnbrautakerfið sem er búið að vera á Aðalskipulagi í mörg ár. 

Hvernig er leiðin úr Skeifunni í Árbæjarhverfi til dæmis?  Meðfram Bústaðaveg? Meðfram Sæbraut? Meðfram Eiðisgranda er verið að klára nýjan særoks-stíg sem liggur að kaflanum meðfram Ánanaustum.  Það er komin reynsla á svona stíga eins og sést á myndunum.

Páll Guðjónsson 

   Stígurinn meðfram Eiðsgranda sem verið er að leggja núna liggur síðan að stígnum við Austurströnd sem hefur skolað í burtu í særokinu þarna eins og sjá má á þessum myndum sem voru teknar í september 2000.