Sumarið 2020 var svolítið öðru vísi.  Í miðjum heimsfaraldri héldum við okkar striki með þriðjudagskvöldferðirnar.  Enda dásamlegt að hjóla um höfuðborgina og nágrennið.  Við ákváðum að breyta um brottfararstað og fara frá Mjódd í stað Fjölskyldu- og húsdýragarðsins.  Við rákumst á gamalt plan og ákváðum að fylgja því að mestu.  Þess vegna var farið oftar í Heiðmörk og úthverfi en áður. 

Það munar um kílómetrana frá Húsdýragarðinum að Mjódd, að maður tali nú ekki um brekkuna.  Þar eð sú er þetta ritar býr í Smáíbúðahverfinu rétt hjá Laugardalnum, þá var þessi brekka hjóluð á hverjum einasta þriðjudegi í sumar.  En hún var þá tekin um kl. 19 og svo var smá pása við Mjóddina áður en við hjóluðum út í kvöldið.

Fyrsta ferðin var í Klúbbhúsið samkvæmt hefð.  Þar fengum við okkur kaffi og heimabakað góðgæti.  Smám saman lengdust og þyngdust kvöldferðirnar.  Það var farið upp að Reynisvatni og út á Bessastaði og allt þar á milli.  Sumrinu lauk svo eins og það hófst, með hófi í Klúbbhúsinu, þar sem Steingrímur Jónsson var krýndur mætingarmeistari 2020, en hann mætti í 15 af 17 ferðum.  Við ætlum að dobbla Steina til vera forystusauður með okkur, Árna og Tryggva þetta sumarið.  Þetta verður eitthvað.

Fyrir mig persónulega var sumarið sérlega ánægjulegt, því Kolmar, sonur minn mætti í 13 ferðir.  Það er nú ekki oft sem unga fólkið nennir að hanga með foreldrum sínum, en hann er mjög áhugasamur um samgönguhjólreiðar og vildi læra á þær fjölmörgu leiðir sem hægt er að fara í nágrenni höfuðborgarinnar.  Heiðmörkin og skógarstígarnir þar vöktu sérstakan áhuga hjá honum og ljóst að hann mun fikra sig lengra í hjólamennskunni.  Hann er líka kominn með bílpróf, en kýs fremur að hjóla eða ganga það sem hann þarf að fara.

Fyrsta þriðjudagskvöldferðin í ár verður 4. maí 2021.  Við munum hittast í Mjódd, á milli Landsbankans og Bakarameistarans.  Brottför kl. 19:30.  Svo verður farið vikulega eftir það út ágúst.

Myndir frá 2020: Hrönn Harðardóttir. Skoðið hér á Google Photos

 

Svipmyndir úr þriðjudagskvöldferðum ÍFHK 2020

Fyrsta þriðjudagskvöldferðin 5. maí var, samkvæmt hefð í gegn um Fossvogsdalinn, út í Klúbbhús Fjallahjólaklúbbsins, þar sem Geir og Tryggvi buðu upp á heimabakað bakkelsi.

 

Fuglaskoðun í Grafarvogi 12 maí.  Hjólað þaðan meðfram sjónum út í Gufunes.  Gætið ykkar á bryggjunni, hún er hrörleg.

 

Þriðja kvöldferðin 19. maí var upp á Laugarás, í gegn um Laugardal og út á Laugarnes.  Með viðkomu í smábátahöfninni.

 

26. maí tókum við hring um gamla Kópavog og enduðum uppi á Víghól.  Þaðan er gott útsýni.

 

2. júní hjóluðum við góðan stíg sem liggur á milli póstnúmer 109 Seljahverfis og 201 Kópavog.  Þaðan í vesturátt út í Garðabæ, tókum hring á Arnarnesinu og enduðum á Catalinu, til að fagna opnun kráa á Íslandi.  Allt í rétta átt í Covid málum hérlendis.

 

23. júní var farið í Heiðmörkina

 

30. júní var hjólað um Austurbæinn að Öskjuhlíð og endað í kaffi á Nauthól.  Á leiðinni skoðuðum við nokkra almenningsgarða.

 

7 júlí var för okkar heitið út á Geldinganes.  Fórum beina leið yfir Árbæ og Grafarvog, niður að sjó og út á Geldinganes.

 

14 júlí var óvissuferð.  Við fórum í gegn um Kópavogsdal, yfir á Álftanes, kíktum á Bessastaði, fórum hringinn í kring um Bessastaðatjörn og enduðum í ísbúð í Garðabæ.  Það rigndi smá en enginn er verri þótt hann vökni.

 

28 júlí var för okkar heitið upp í heiðmörk.  Nánar tiltekið Grunnavötn.  Komum við í fallegum garði í Breiðholti með fallegri tjörn.  Og Guðmundarlundi, sem er fallegt útivistarsvæði.

 

4 ágúst átti að hjóla upp í Mosfellsbæ, en sökum rigningar og fámennis ákváðum við að stytta túrinn og fara í Cafe Flóru í Laugardalnum.  Æskunni er viðbjargandi, svei mér þá.  Við rákumst á 3 hressa krakka við Langholtsskóla sem létu smá rigningu ekki stöðva sig.  Nóg pláss í Cafe Flóru og ekkert mál að virða 2ja metra regluna.

 

11 ágúst var hjólað upp í Heiðmörk að Silungapolli.

 

18 ágúst.  Breiðholt hjólað í bongóblíðu.  Komið við á Gamla Kaffihúsinu og svo hjólaður göngustígur sem liggur hringinn í kring um Breiðholtið.

 

25 ágúst

 

1 september var lokahóf og mætingameistari 2020 krýndur.  Það var Steingrímur Jónsson sem mætti oftast, alls 15 sinnum.  Umsjónaðilar þetta sumarið voru Hrönn, Árni og Tryggvi.