Íslenski Fjallahjólaklúbburinn

Miklabraut 8. apríl 1999

Í kjölfar Hjólaþingsins virðist hafa verið brugðist við í skyndi og sett upp nokkur skilti við þessar framkvæmdir. Þessar myndir voru teknar 5.- 8. apríl 1999. Vonandi verður þetta útfært betur.


Þegar komið er að framkvæmdunum suðvestanmegin markar þetta himinháa skilti lokað framkvæmdasvæðið. Annað ennþá hærra skilti á líklega að merkja stíginn bak við grindverkið sem hjáleið.


Betra væri að taka grindverkið sem lokar stígnum, og neyðir fólk út í forina eins og förin sýna, og setja ör sem vísar leiðina frekar en þetta skilti sem ber við himin í um það bil 4m hæð. T.d. með standi í sjónhæð eins og notaður er fyrir þessa ágætu merkingu á hjáleið bifreiða og hugsanlega mætti nota þetta ágæta skilti eins og sést hægramegin.




Norðvestanmegin er annað skilti sem segir að stígurinn sé lokaður vegna framkvæmda. Engin hjáleið er merkt en sporin í forinni marka leiðina með nokkuð skýrum hætti.



Aðkoman innan úr Skeifunni að þessum stað er hreint ótrúleg.

Stígur hefur verið lagður þarna af natni, en svo endar hann skyndilega á miðri þessari litlu eyju með fláa öðrumegin og kanti hinu megin.


Síðan kemur eitt af þessum háu skiltum sem vísar fólki göngu og hjólastíg sem nokkrum skrefum lengra hverfur undir framkvæmdir. Glöggir vegfarendur sjá kannski annað skilti handan við bílastæðið.


Ef komið er norðaustan að framkvæmdunum, má sjá lengst til vinstri lítið skilti sem segir að gönguleiðin meðfram Miklubraut sé lokuð vegna framkvæmda. Það ætti öllum að vera ljóst enda enginn stígur þarna lengur og fólk komið inn á framkvæmdasvæðið. Í norðurátt vísa tvö mun stærri skilti á göngu og hjólastíg.




Áður en komið er yfir gatnamótin er engin merking. Þegar ég fór eftir þessum ágætlega merktu göngu og hjólastígum þurfti að vaða leðju og for.





Ef ég hef skilið þetta rétt þá er allur þessi vegur sérlagður sem hjáleið fyrir umferð bifreiða og ekki ætlað að vera þarna til frambúðar. Ekki veit ég hvað vegurinn kostaði en vonandi var líka reiknað með peningum til að útbúa hjáleiðir fyrir aðrar tegundir umferðar en bifreiða.


Suðaustan megin er engin merking, hvorki til að merkja framkvæmdasvæðið eða hjáleið. Þarna eru börnin í hverfinu komin í vorhug, búin að draga hjólin sín út úr geymslunni og stefna beint á framkvæmdasvæðið. Skyldu þau vera að svipast um eftir skiltum í 4 m hæð?