Á haustin hefjast haustútsölur í reiðhjólaverslunum og þar má gera góð kaup á reiðhjólum og fylgihlutum þeirra, og hjólafatnaði ýmisskonar. Haustið er nefnilega rétti tíminn til að kaupa sér reiðhjól, þá eru þau ódýrust. Ekki er þó ráðlegt að kaupa hjól handa börnum á haustin, því hjól sem passar barninu í haust getur verið of lítið næsta vor.

Þetta er yfirskrift athyglisverðrar greinar eftir einn stjórnarmann Náttúruverndarsamtaka Íslands sem birtist í Degi 15 janúar. Samtökin hafa verið öflug í því að veita stjórnvöldum heilbrigt aðhald með vönduðum og vel rökstuddum málflutningi. Allir umhverfissinnar ættu að styðja starfið með því að gerast meðlimir og einnig er hægt að fá stöðugt nýjustu fréttir af umhverfismálunum á tölvupóstinum frá þeim.  PG

Lokafrestur til að senda inn athugasemdir við fyrirhugað skipulag miðhálendisins rann út í desember eftir að hafa verið framlengdur. Eftir að við kynntum okkur skipulagið gátum við ekki orða bundist og sendum inn okkar athugasemdir við það ásamt á annað hundrað annara aðila og nú er bara að vona að ráðamenn taki mark á þeim og hugsi þetta upp á nýtt. Það er ótækt að meirihluti íslendinga hafi ekkert að segja um þessa þjóðargersemi og enn verra að setja yfirráðin í hendur margra tuga hreppsstjórna með mismunandi viðhorf og hagsmuni, skipaða fólki sem oft sinnir störfum þessum í hlutastarfi og af vanefnum. Skipulagið og gögn sem fylgja liggja frammi í klúbbhúsinu okkar fyrir þá sem vilja kynna sér þetta mikilvæga mál. PG

Það fór líklega ekki fram hjá neinum að frá og með 1. október er búið að lögleiða hjálma á börn fram að 15 ára aldri. Í fjölmiðlum voru deildar meiningar um þetta mál og mörgum þótti það undarlegt að lögin skyldu ekki ganga yfir alla aldurshópa. Í stuttu máli sagt var einstaklega illa staðið að þessum málum enda var aldrei haft samband við hagsmunaaðila hjólreiðafólks. Svo virðist vera að alskyns óskyldir hópar séu að kássast í okkar málum og fá eflaust borgað fyrir það. Sú skoðun er líka til að það hafi verið fáránlegt að lögleiða hjálma almennt. Lítið á heimasíðu Dansk Cyklist Forbund, textinn er á ensku og slóðin er http://webhotel.umi-c.dk/dck. Það er skoðun margra að hjálmaskylda fæli fólk frá því að stíga fyrsta skrefið og prófa smá hjólatúr, finnist þetta of flókið og mikið vesen og haldi sig bara við einkabílinn og letilífið. MB.

Það er óhætt að segja að aðgengi fyrir óvélvædda umferð í Reykjavík hafi batnað ótrúlega mikið undanfarin misseri. Byggðar hafa verið brýr yfir miklar umferðaræðar, gangstéttafláar lækkaðir og sumar leiðir strætisvagna taka nú við reiðhjólum.

Framtaki Reykjavíkurborgar í gerð göngustíga og bættu aðgengi verður veitt viðurkenning í dag. Með því vilja fimm félagasamtök lýsa yfir ánægju sinni með ákvarðanir borgaryfirvalda í því að gera göngustíga í Reykjavík aðgengilega fyrir alla.

Laugavegsmálið

Þá tókst kaupmannasamtökunum við Laugaveg að koma fram vilja sínum og banna hjólreiðar við Laugaveg. í Lögbirtingarblaðinu 30. apríl 1996 birtist eftirfarandi: "Auglýsing um umferð í Reykjavík. Samkvæmt heimild í 81. gr. umferðalaga nr. 50/1987 og að fenginni tillögu borgarráðs hefur verið ákveðið bann við hjólreiðum á Laugaveg frá Hlemmi að Bankastræti og á gangstéttum í Bankastræti. Ákvörðun þessi tekur gildi 10. maí 1996."

Veðrið í sumar hefur verið alveg einstaklega gott og þá sérstaklega á suðvestur horni landsins. Fjöldi fólks hefur líka nýtt sér þetta veður og farið á milli staða á reiðhjóli. Þó eru þeir margir sem gjarnan vildu nota hjólið, en treysta sér ekki til þess þar sem aðstaða fyrir hjólreiðamenn er engin. Í þeim efnum er skipulag höfuðborgarsvæðisins algjört klúður. Það er ekki víst að allir hafi hugleitt hvað hægt er að gera til að bæta ástandið. En þeir sem hjólað hafa erlendis og kynnt sér þessi mál vita að hér þarf að taka til hendinni.

Stjórnvöld hafa lítinn áhuga á að bæta þessi mál vegna þekkingarleysis og svo eru margir sterkir aðilar sem frekar vilja auka velferð einkabílsins. Vissulega skapa stórbrotnar vegaframkvæmdir atvinnu fyrir verktaka sem ausið hafa peningum í stórvirk jarðvinnslutæki.