Næsta fimmtudagskvöld er kaffihúsakvöld og verður að vanda boðið upp á gott kaffi. Einhverjar sérstaklega góðar baunir verða valdar í þetta sinn.
Í haust var hugmyndasamkeppni um skipulag Öskjuhlíðar. Undirritaður sendi ásamt félögum inn tillögur að hjólasvæði í Öskjuhlíð. Var tillagan valin í hóp tíu tillagna sem verðlaun hlutu. Ég ætla að kynna tillögurnar á fimmtudaginn og spjalla um Öskjuhlíð og hjólasvæði. Sjáum svo hvert spjallið leiðir okkur. Klúbbhúsið Brekkustíg 2 opnar kl. 20.

Arnaldur

Það verður kompukvöld síðasta fimmtudag nóvembermánaðar og það hefur frést að nokkrir þungavigtarmenn úr bransanum komi vel klyfjaðir svo að nú er eins gott að mæta og gera kaup ársins í hjóladóti.
Klúbbhúsið Brekkustíg 2 opnar kl. 20.

Ágætu félagar. Fimmtudaginn 22. nóvember verður opið hús hjá Fjallahjólaklúbbnum og gestir kvöldsins eru stofnendur nýjustu hjólabúðarinnar í bænum, Reiðhjólaverslunarinnar Berlín, sem hóf göngu sína í júlí sl. Hún sérhæfir sig í klassískum hjólum og fatnaði, allt frá sokkum upp í vetrarfrakka, sérstaklega ætlað fyrir borgarhjólreiðar. Klúbbhúsið Brekkustíg 2 opnar kl. 20.
Viðgerðaraðstaðan verður sem endranær opin á neðri hæðinni. Verið velkomin. Þökk fyrir og sjáumst

Næsta fimmtudagskvöld (15. nóv) er þemað vetrarhjólreiðar. Farið verður lauslega yfir ýmislegt tengt vetrarhjólreiðum. Þetta verður óformlegt en kjörið tækifæri til að spyrja um búnað og fleira tengt vetrarhjólreiðum.

Eitt af því sem þarf til hjólreiða í skammdeginu er góður ljósabúnaður. Albert Jakobsson úr HFR kemur með nokkur ljós frá Light and Motion til að sýna okkur.

Kaffihúsakaffi verður í boði.

Slökkvitæki ehf ætlar að veita meðlimum ÍFHK 15% afslátt af vinnu (t.d. við endurhleðslu slökkvitækja o.þ.h.). Þeir selja slökkvitæki, reykskynjara, eldvarnarteppi ofl ofl tengt því að verja gegn eldsvoða. Slökkvitæki ehf, Helluhrauni 10, 220 Hafnafirði opið 10 til 17 virka daga. www.eldklar.is

Myndakvöld 8 nóvember í klúbbhúsinu að Brekkustíg 2.  Sýndar verða myndir og myndskeið frá starfsemi Fjallahjólaklúbbsins.  Þriðjudagsferðirnar, Viðeyjarferðin, svipmyndir frá opnu húsi á fimmtudögum, viðgerðanámskeið, vorhátíðin o.fl o.fl.  Myndirnar verða sýndar kl 20:15 og svo verða myndböndin sýnd eftir kaffihlé um kl 21.  Garðar og Örlygur hella upp á kaffi og baka vöfflur.

Couch Fest Films og Fjallahjólaklúbburinn býður unnendum kvikmynda að koma og njóta þess að horfa á nokkrar stuttmyndir í hlýlegu og heimilislegu umhverfi að Brekkustíg 2, 101 Reykjavík.  Laugardaginn 10 nóvember 2012.  Sýningin hefst kl 14:00 og stendur í klukkutíma.  Þó er rétt að taka fram að myndirnar sem verða sýndar í klúbbhúsinu eru tilraunakenndar og ekki við hæfi barna eða viðkvæms fólks.  Hér má sjá þær myndir sem verða sýndar í klúbbhúsinu: http://www.couchfestfilms.com/films-2012-rvk1.html Aðgangur ókeypis og allir vekomnir á meðan húsrúm leyfir.  Og hér má sjá dagskrána í Reykjavík, sýnt verður á nokkrum stöðum í Reykjavík þennan dag og fólk hefur tíma til að labba / hjóla á milli þeirra.  http://www.couchfestfilms.com/RVK2012.html

Hvað er betra í upphafi aðventu en gíra sig niður í smá kósíheit og jólastemmingu með félögum úr Fjallahjólaklúbbnum.  Farið verður í bústað við Úlfljótsvatn föstudaginn 30.11.2012, borðaðar piparkökur, drukkið kakó, farið í heita pottinn eða gert hvaðeina sem fólk langar til.  Frjáls dagskrá á föstudegi.  Þar eð veður geta verið válynd á þessum árstíma verður laugardagurinn ekki skipulagður fyrirfram, nema það verður hjólað eitthvert.  Hvort það verði eitthvað út fyrir heimreiðina kemur í ljós, ef hann brestur á með sól og blíðu verður hjólað í kring um Þingvallavatn, 65 km leið.  Annars niður með Úlfljótsvatni, gegn um Þrastarskóg, upp með Soginu og aftur að bústöðunum, 30 km.  Eða bara keppni, hver gerir flottasta snjóengilinn.

Aðalfundur ÍFHK verður haldinn 18. okt. kl. 20 að Brekkustíg 2.
Hér með er jafnframt auglýst eftir framboðum til stjórnar klúbbsins. Þeir sem hyggja á framboð, sendi tilkynningu í netfangið This email address is being protected from spambots. You need JavaScript enabled to view it.

9. grein: Stjórn félagsins skal kjörin á aðalfundi til eins árs í senn. Stjórnina skipa 5 menn: Formaður, varaformaður, ritari, gjaldkeri og meðstjórnandi. Einnig skal kjósa endurskoðanda og formenn nefnda.

Ennfremur er auglýst eftir tillögum að lagabreytingum.

Á opnu húsi ÍFHK næstkomandi fimmtudagskvöld verður kynning á VÄTTERNRUNDAN, stærsta afþreyingarhjólamóti í heimi með yfir 20 þúsund þáttakendum sem hjóla 300 kílómetra leið kringum VÄTTERN. Þáttakendum frá Íslandi hefur fjölgað ár frá ári og í sumar fór 11 manna hópur sem kláraði allur keppni. Hópurinn mætir með ferðasöguna í farteskinu, myndir og videó, ásamt því að spjalla við áhugasama um þáttökuna og hvað þarf að hafa í huga. Léttar veitingar verða á boðstólnum. Húsið opnar kl. 20.

Fimmtudaginn 13. september 2012 verður haldið viðgerðar og vetrarundirbúningsnámskeið í klúbbhúsi Fjallahjólaklúbbsinns kl 20:00 til 22:00. Farið verður yfir helstu atriði í bremsu og gírbúnaði sem og það helsta sem þarf að hafa í huga þegar vetur gengur í garð. Léttar veitingar. Námskeiðið er á „óformlegufyrirlestrarformi“ og því skráning óþörf. Frítt fyrir meðlimi ÍHFK, 1000,- fyrir aðra.

Framundan er hjólaráðstefnan; Hjólum til framtíðar 2012; rannsóknir og reynsla. Hún verður haldin í Iðnó 21. september frá kl. 9 - 17.

Í ár leggjum við áherslu á það sem efst ber á baugi í heimi hjólavísindanna og reynslu þeirra sem hafa eflt hjólreiðar í sínu nærumhverfi.

Til landsins koma virtir vísindamenn með fyrirlestra m.a. frá Bretlandi og Finnlandi. Einnig verða innlendar hjólatengdar rannsóknarniðurstöður og rannsóknir kynntar auk þess sem farið verður yfir reynslu einstaklinga, fyrirtækja og sveitarfélaga af eflingu hjólreiða.

Þriðjudaginn 4 september verður lokahóf þriðjudagskvöldferða, og hlýtur sá farandbikarinn sem hefur oftast mætt í sumar.  Mæting í Fjölskyldu-og húsdýragarðinum kl 19:30, við munum hjóla um nágrennið og enda hjá GÁP kl 20:00 þar sem boðið verður upp á grillaðar pylsur.  Hófinu lýkur svo um kl 21:00 með því að úrslit verða kunngjörð.  Hákon J. Hákonarson hefur gefið Fjallahjólaklúbbnum veglegan farandbikar sem og styttu sem vinningshafinn fær til eignar.  Síðar í haust verður myndakvöld í klúbbhúsinu, þar sem sýndar verða allar myndir sem hafa verið teknar í sumar, og einnig myndbönd sýnd frá þessum skemmtilegu hjólatúrum.

Árviss ferð að hausti. Hist verður við Árbæjarsafn 15. september kl. 12 og hjóluð Nesjavallaleið yfir Hengilinn og niður að Úlfljótsvatni. Náttúrufegurðin er einstök við bæjardyr höfuðborgarsvæðisins og fallegt að sjá haustlitina með þessum vistvæna ferðamáta. Gist verður í góðum bústað með rúmum og svefnlofti, grillað og farið í pottinn. Hjóluð sama leið til baka.  Mestur hluti leiðarinnar er á malbiki og leiðin vel fær götuhjólum, þó ekki racerum.  Það eru nokkrar brattar brekkur, svo fólk þarf að vera í sæmilegu hjólaformi, en þetta er ferð sem flestir sem hafa hjólað í klukkutíma eða meira samfleytt geta farið í.

Þriðjudaginn 17 júlí munum við hjóla út í Hafnarfjörð, skoða Hellisgerði og fara á kaffihús í miðbænum.  Fólk má búast við að ekki verði komið aftur í Höfuðborgina fyrr en kl 23:00, upplagt að hafa með sér vatn á brúsa og eitthvað að maula á leiðinni til að halda uppi orkunni.  Brottför frá Fjölskyldu og húsdýragarðinum, aðalinngangi kl 19:30

Fjallahjólaklúbburinn fer í sína árvissu hjólaferð til Viðeyjar, þriðjudaginn 26.júní 2012.  Mæting við Viðeyjarferju, Skarfaklettum 3 ekki síðar en kl 19:00, brottför er 19:15.  Kaupa þarf miða í ferjuna (kr 1.000,00), og ef fólk vill fá sér vöfflukaffi í Viðeyjarstofu, þá er tilboð í miðasölunni, sigling og vaffla.  Það verður hjólað um eyjuna, sagan skoðuð sem og hús og minjar.  Siglt aftur til baka kl 22:00

Gott fólk.

Mig langar að bjóða ykkur í barna- og fjölskylduhjólaferð laugardaginn 16. júní kl. 10, frá aðalinngangi Fjölskyldu- og húsdýragarðsins. Allir velkomnir óháð börnum og fjölskyldu. Leiðin verður a.m.k. einn hringur í Laugardal (2,5 km) fyrir þá allra minnstu. Eftir það, fyrir þá sem vilja, getum við haldið áfram að hjóla t.d. inn í Fossvogsdal, og/eða myndað eins konar hjólalest og fylgja þátttakendum áleiðis heim. Sjalfsagt er að stoppa við rólóin á leiðinni.

Með von um að sja sem flesta.

Bestu kveðjur, Ulla Zuehlke
Nánari upplýsingar This email address is being protected from spambots. You need JavaScript enabled to view it. eða í síma 8497238.

Kompukvöld verður haldið fimmtudaginn 14 júní  á Brekkustígnum. Kompukvöldin eru orðin nokkuð fastur punktur í starfsemi félagsins þar sem hjólafólk getur selt eða keypt ýmsan varning .. föt, dekk, gírskipta, styri, dempara og margt annað. Að þessu sinni ætlum við að bjóða fólki að koma með hjól til sölu af öllum stærðum og gerðum. Tilvalið fyrir unga sem gamla að selja eða kaupa draumahjólið á viðráðanlegu verði. Að sjálfsögðu má prútta ! Kaffi á könnunni og viðgerðaraðstaðan opin að venju.

Fyrirhugað demparanámskeið frestast um 2 vikur.

Það er opið kvöld á fimmtudaginn. Viðgerðaraðstaðan verður að sjálfsögðu opin. Kaffikarlinn verður á staðnum og býður upp á kaffidrykki úr vélinni góðu.