Starfsmenn Reykjavíkurborgar vinna nú að uppsetningu tímabundins hjólreiðastígs á Hverfisgötu sem tekinn verður í notkun föstudaginn 20. ágúst. Á opnu húsi á fimmtudaginn 19. ágúst kemur Hans Heiðar Tryggvason arkítekt og kynnir hugmyndina að baki og framkvæmdina sjálfa. Húsið opnar kl 20 en Hans hefur kynninguna sína kl 21. og situr fyrir svörum á eftir.
Umhverfis- og samgönguráð samþykkti á fundi sínum í síðustu viku að hleypa þessu tilraunaverkefni af stað til að efla mannlíf í miðborginni og hvetja til aukinna hjólreiða.
„Markmið tilraunarinnar er að vekja athygli á Hverfisgötu, möguleikum hennar og sérstöðu og gera hjólreiðar að fullgildum samgöngumáta á þessari leið“ segir Hans Heiðar Tryggvason, verkefnisstjóri hjá Umhverfis- og samgöngusviði sem unnið hefur að verkefninu í sumar ásamt Örnu Ösp Guðbrandsdóttur. „Á næsta ári er fyrirhugað að bæta við 10 km af hjólaleiðum í borginni og mun tilraunin á Hverfisgötu veita okkur góð gögn fyrir þá vinnu“ segir Pálmi Freyr Randversson, sérfræðingur hjá Samgönguskrifstofu.
35 gjaldskyld bílastæði á Hverfisgötu verða helguð hjólreiðum í þessari tilraun og hefur verkefnið verið kynnt fyrir íbúum og þjónustuaðilum. Verslunareigendur eru almennt jákvæðir enda sýna erlendar rannsóknir að hjólandi og gangandi vegfarendur nýta sér betur verslun og þjónustu í miðborgum en aðrir vegfarendur. „Ég hef engar áhyggjur af því að það komi færri í búðina þótt það sé ekki laust stæði beint fyrir utan, það er nóg af bílastæðum hér í nágrenninu“ segir Ingvar Geirsson, eigandi plötubúðarinnar Lucky Records á Hverfisgötu. Má þar t.d. benda á bílastæðahúsin við Vitatorg og Traðarkot.
Tilraunin stendur frá föstudeginum 20. ágúst og út septembermánuð og er kostnaði haldið í lágmarki. Borgarbúar eru eindregið hvattir til að senda ábendingar um upplifun sína af verkefninu á netfangið This email address is being protected from spambots. You need JavaScript enabled to view it. hjá Umhverfis- og samgöngusviði Reykjavíkur.