Út var að koma hjá Vestfirska forlaginu handbók um hjólreiðaleiðir á Vestfjörðum og kemur hún hjólreiðafólki í góðar þarfir þegar sumrar. Þar eru meðal annars lýsingar á nokkrum leiðum sem liggja um Reykhólahrepp. Handbókin heitir Hjólabókin og undirtitill er Dagleiðir í hring á hjóli. Höfundur er Ómar Smári Kristinsson á Ísafirði. Í riti þessu, sem er nýlunda hérlendis, er að finna ítarlegar upplýsingar um fjórtán freistandi dagleiðir í hring á hjóli.
Rúmlega 200 ljósmyndir eru í bókinni, 6 teikningar, 15 töflur og gröf og 20 kort. Birtir eru GPS-punktar á völdum stöðum. Allar leiðirnar eru teiknaðar með litaskala sem útskýrir hve brattinn er mikill. Auk fróðleiksmola sem fylgja hverjum kafla eru tillögur að nærliggjandi leiðum. Aftast er ítarleg örnefnaskrá.
Kaflarnir (hringirnir) eru þessir:
Svalvogahringurinn
Vestfirsku Alparnir
Dýrafjörður
Önundarfjörður
Ísafjörður - Bolungarvík
Mjóifjörður í Djúpi
Innstu firðir Djúps
Langidalur og Lágidalur
Kringum Vatnsdal
Þingmannaheiði
Árneshreppur
Kaldrananeshreppur
Tröllatunguheiði, Steinadalsheiði
Gilsfjörður
Hjólabókin fæst í Hólakaupum á Reykhólum eins og aðrar bækur Vestfirska forlagsins.
Uppruni: Skutull.is
Bókin er fáanleg í betri bókabúðum um land allt og beint frá Vestfirska forlagsinu .
Hjóla Hrönn fjallaði um bókina á blogginu sínu: Lesið hér
